![ഛിന്നഗ്രഹം ഇന്ന് ഭൂമിയോട് ഏറ്റവും അടുത്ത്; 2038 ജൂലൈ 12 ന് ഭൂമിയുമായി കൂട്ടിയിടിച്ചേക്കുമെന്ന് നാസയുടെ മുന്നറിയിപ്പ്](assets/news_post/earth27973.jpg)
വാഷിങ്ടൻ: 2024 കെഎൻ1 എന്ന ഛിന്നഗ്രഹം ഇന്ന് ഭൂമിയോട് ഏറ്റവും അടുത്തെത്തുമെന്ന് നാസ. മണിക്കൂറിൽ 16,500 കിലോമീറ്റർ വേഗത്തിലാണ് ഒരു യാത്രാവിമാനത്തിന്റെ വലുപ്പമുള്ള ഛിന്നഗ്രഹം സഞ്ചരിക്കുന്നത്. അമോർ ഗ്രൂപ്പിൽപെടുന്ന ഈ ഛിന്നഗ്രഹത്തിന്റെ വ്യാസം 88 അടിയാണ്.
ഇന്ന് രാത്രി 11 39 ന് ഭൂമിയിൽ നിന്നും 56 ലക്ഷം കിലോമീറ്റർ അകലത്തിലെത്തുന്ന ഈ ഛിന്നഗ്രഹം നിലവിൽ ഭൂമിക്ക് ഭീഷണിയല്ല. എന്നാൽ, 2038 ജൂലൈ 12 ന് ഇതേ ഛിന്നഗ്രഹം ഭൂമിയുമായി കൂട്ടിയിടിച്ചേക്കുമെന്നും അതിനുള്ള സാധ്യത 72 ശതമാനമാണെന്നും നാസ മുന്നറിയിപ്പ് നൽകുന്നു.
ഛിന്നഗ്രഹ ഭീഷണികളെപ്പറ്റി പഠിക്കാനും പ്രതിരോധ മാർഗങ്ങൾ വിലയിരുത്താനുമായി നടത്തുന്ന പ്ലാനറ്ററി ഡിഫൻസ് ഇന്ററാജൻസി ടേബിൾടോപ് എക്സർസൈസിന്റെ ഭാഗമായാണ് നാസയുടെ കണ്ടെത്തൽ. യുഎസ് സർക്കാർ ഏജൻസികളിലെ നൂറോളം പ്രതിനിധികളും രാജ്യാന്തര വിദഗ്ധരുമടങ്ങുന്ന സംഘം പങ്കെടുത്ത എക്സർസൈസ് മേരിലൻഡിലെ ജോൺഹോപ്കിൻസ് അപ്ലൈഡ് ഫിസിക്സ് ലബോറട്ടറിയിലാണ് നടന്നത്. അതേസമയം, ഛിന്നഗ്രഹത്തിന്റെ വരവ്, അവയെപ്പറ്റി പഠിക്കാനുള്ള മികച്ച അവസരം കൂടിയാണ് ശാസ്ത്രജ്ഞർക്ക് ഒരുക്കുന്നത്.