പെക്കിങ് യൂണിവേഴ്‌സിറ്റിയിൽ കമ്യൂണിസ്‌റ്റ് യൂത്ത് ലീഗ് സെക്രട്ടറിയായാണ് ലി കെചിയാങിന്റെ രാഷ്ട്രീയ ജീവിതം ആരംഭിച്ചത്.
ബീജിംഗ്: മുൻ ചൈനീസ് പ്രധാനമന്ത്രി ലി കെചിയാങ് അന്തരിച്ചു. ഹൃദയാഘാതത്തെ തുടർന്നാണ് 68കാരനായ ലി കെചിയാങിന്റെ അന്ത്യം. ചൈനീസ് കമ്മ്യൂണിസ്റ്റ് പാർട്ടിയിലെ ഏറ്റവും ശക്തനായ രണ്ടാമത്തെ വ്യക്തിയായിരുന്നു ലി കെചിയാങ്. 2013 മുതൽ 10 വർഷം ചൈനയുടെ പ്രധാനമന്ത്രിയായിരുന്ന ലി കെചിയാങ് ഈ വർഷം ആദ്യമാണ് പ്രധാനമന്ത്രിപദം ഒഴിഞ്ഞത്.
പെക്കിങ് യൂണിവേഴ്‌സിറ്റിയിൽ കമ്യൂണിസ്‌റ്റ് യൂത്ത് ലീഗ് സെക്രട്ടറിയായാണ് ലി കെചിയാങിന്റെ രാഷ്ട്രീയ ജീവിതം ആരംഭിച്ചത്. മാവോ സെ ദുങ് ചിന്തകളുടെ പഠനത്തിൽ പെക്കിങ് യൂണിവേഴ്‌സിറ്റിയിൽ ഒന്നാമനായിരുന്നു. നിയമത്തിൽ ബിരുദവും സാമ്പത്തികശാസ്‌ത്രത്തിൽ ഡോക്‌ടറേറ്റും നേടിയ ലി കെചിയാങിന്റെ കാലത്താണ് ചൈന സാമ്പത്തിക രംഗത്ത് നിർണായക ശക്തിയായത്.
ഹു ജിന്റാവോ പ്രസിഡന്റ് ആയിരിക്കെ ഇപ്പോഴത്തെ ചൈനീസ് പ്രസിഡന്റ് ഷി ചിൻപിങ് വൈസ് പ്രസിഡന്റും ലി ഉപപ്രധാനമന്ത്രിയും ആയിരുന്നു. 2012ലാണ് ചൈനയുടെ പ്രസിഡന്റായി ഷി ചിൻപിങ്ങും പ്രധാനമന്ത്രിയായി ലി കെചിയാങ്ങും സ്ഥാനമേറ്റത്.
