കൊല്ലം : അമിതമായി പൊറോട്ടയും ചക്കയും കഴിച്ച് കൊല്ലത്തെ സ്വകാര്യ വ്യക്തിയുടെ ഫാമിലെ അഞ്ച് പശുക്കൾ ചത്തു. വെളിനല്ലൂർ വട്ടപ്പാറ ഹസ്ബുള്ളയെന്ന വ്യക്തിയുടെ ഫാമിലാണ് പശുക്കൾ കൂട്ടത്തോടെ ചത്തത്.
പശുക്കൾക്ക് നൽകിയ ഭക്ഷണത്തിൽ അമിതമായ അളവിൽ പൊറോട്ടയും ചക്കയും ഉൾപ്പെട്ടിരുന്നു. പശുക്കൾ അസ്വസ്ഥത പ്രകടിപ്പിക്കുകയും തുടർന്ന് അവശരായി കുഴഞ്ഞ് വീഴുകയും ചെയ്തു.
ജില്ലാ വെറ്റിനറി കേന്ദ്രത്തിൽ നിന്നും ക്വിക് റെസ്പോൺസ് ടീം എത്തി ചികിത്സ നൽകി എങ്കിലും ജീവൻ രക്ഷിക്കുവാൻ സാധിച്ചില്ല. ഭക്ഷ്യ വിഷബാധയെ തുടർന്നുള്ള മരണമായതിനാൽ പശുക്കളുടെ മൃതദേഹങ്ങൾ പോസ്റ്റ്മോർട്ടം ചെയ്തു.
ദുരന്ത വിവരം അറിഞ്ഞ് മന്ത്രി ചിഞ്ചുറാണി ഫാം സന്ദർശിച്ചു. കർഷകന് നഷ്ടപരിഹാരം ലഭിക്കുന്നതിന് ആവശ്യമായ നടപടി സ്വീകരിക്കുമെന്നും
പശുക്കളുടെ ഭക്ഷണത്തെ കുറിച്ച് കർഷകർക്ക് അവബോധം നൽകുമെന്നും മന്ത്രി വ്യക്തമാക്കി.