കോഴിക്കോട്: യുവതി ജീവനൊടുക്കിയത് അയൽവാസികളുടെ ഭീഷണിയെ തുടർന്നെന്ന് പരാതി. ഉള്ളിേയരി പാലോറ കാവോട്ട് ഷൈജി (42)യുടെ മരണത്തിലാണ് യുവതിയുടെ മകൾ അയൽവാസികൾക്കെതിരെ പരാതി നൽകിയത്. ഒരു കുടുംബത്തിലെ നാലു പേർക്കെതിരെയാണ് ഷൈജിയുടെ മകൾ അത്തോളി പൊലീസിൽ പരാതി നൽകിയത്.
ഈ മാസം 19ന് പുലർച്ചെയാണ് വീട്ടുമുറ്റത്തെ മരത്തിൽ ഷാളിൽ തൂങ്ങിമരിച്ച നിലയിൽ ഷൈജിയെ കണ്ടെത്തിയത്. ഷൈജി ആത്മഹത്യ ചെയ്തതിന്റെ തലേദിവസം രാവിലെ രണ്ടു പേർ വീട്ടിലെത്തി ഷൈജിയെയും മക്കളെയും ഭീഷണിപ്പെടുത്തിയെന്നാണ് പരാതി. ഷൈജിയുടെ വ്യാജ ഫോട്ടോകൾ മകളെ കാണിച്ചതായും ജീവിക്കാൻ അനുവദിക്കില്ലെന്ന് ഭീഷണിപ്പടുത്തിയെന്നും ബന്ധുക്കൾ പറഞ്ഞു.
മരിച്ച ഷൈജിയുടെ രണ്ടു കുട്ടികളും വിദ്യാർഥികളാണ്. അസ്വാഭാവിക മരണത്തിന് പൊലീസ് കേസെടുത്ത് അന്വേഷണം ആരംഭിച്ചിരുന്നു. ഇതിനിടെയാണ് ഭീഷണിപ്പെടുത്തിയെന്നാരോപിച്ച് മകൾ നാലു പേർക്കെതിരെ പരാതി നൽകിയത്.
