പത്തനംതിട്ട: സർക്കാർ ഓഫിസിൽവച്ച് റീൽസ് ചിത്രീകരിച്ച സംഭവത്തിൽ വിശദീകരണം നൽകി ജീവനക്കാർ. തിരുവല്ല നഗരസഭയിലെ കാരണംകാണിക്കൽ നോട്ടീസ് ലഭിച്ച ഒൻപത് ജീവനക്കാരാണ് സീനിയർ സൂപ്രണ്ടിന് വിശദീകരണം നൽകിയത്. നഗരസഭാ സെക്രട്ടറി അവധിയിലായതിനാലാണ് സീനിയർ സൂപ്രണ്ടിന് വിശദീകരണം നൽകിയത്. ഞായറാഴ്ചയാണ് വിഡിയോ ചിത്രീകരിച്ചതെന്നാണ് ജീവനക്കാരുടെ വിശദീകരണം.
ദുരന്തനിവാരണത്തിന്റെ ഭാഗമായി കലക്ടറുടെ പ്രത്യേക നിർദ്ദേശപ്രകാരമാണ് ഞയറാഴ്ച്ചയും ഇവർ ജോലിക്കെത്തിയത്. ഞായറാഴ്ച ഉച്ചയ്ക്ക് ഭക്ഷണം കഴിക്കാനുള്ള ഇടവേളയിലാണ് റീൽസ് എടുത്തതെന്നും വിശദീകരണത്തിൽ പറയുന്നു. അതേസമയം, നഗരകാര്യ വകുപ്പിലെ ഉന്നത ഉദ്യോഗസ്ഥരുമായി ആലോചിച്ചു തുടർ നടപടികൾ സ്വീകരിക്കുമെന്ന് മുൻസിപ്പൽ സെക്രട്ടറി അറിയിച്ചു.
ഓഫിസ് സമയത്ത് ഓഫിസിനുള്ളിൽ റീൽസ് പകർത്തിയത് അച്ചടക്ക ലംഘനമാണെന്നു ചൂണ്ടിക്കാട്ടി നഗരസഭാ സെക്രട്ടറി ജീവനക്കാർക്കു കാരണം കാണിക്കൽ നോട്ടിസ് നൽകിയിരുന്നു. കൈപ്പറ്റി 3 ദിവസത്തിനകം രേഖാമൂലം വിശദീകരണം നൽകിയില്ലെങ്കിൽ അച്ചടക്ക നടപടി നേരിടേണ്ടി വരുമെന്നാണ് നോട്ടിസിൽ പറയുന്നത്.