മുസ്ലീം ലീഗിനെ കോൺഗ്രസിൽ നിന്ന് അകറ്റുക എന്നതാണ് സിപിഎമ്മിന്റെ ലക്ഷ്യം
കണ്ണൂർ: സിപിഎം ക്ഷണം നിരസിച്ച മുസ്ലീം ലീഗ് തീരുമാനത്തിൽ സന്തോഷം മറച്ചുവെക്കാതെ കോൺഗ്രസ്. ഏകീകൃത സിവിൽ കോഡിനെതിരായ സിപിഎം സെമിനാറിൽ പങ്കെടുക്കില്ലെന്ന ലീഗ് തീരുമാനത്തിൽ സന്തോഷമെന്നായിരുന്നു കെപിസിസി പ്രസിഡന്റ് കെ സുധാകരന്റെ പ്രതികരണം. ലീഗിന്റെ വികാര വിചാരങ്ങൾ ഉൾക്കൊണ്ടാണ് കോൺഗ്രസ് പ്രവർത്തിക്കുന്നതെന്നും മുസ്ലീം ലീഗ് കോൺഗ്രസ് വിട്ടുപോകില്ലെന്ന ഉറച്ച വിശ്വാസമുണ്ടെന്നും അദ്ദേഹം പറഞ്ഞു.
സിപിഎമ്മിനെതിരെയും കെ സുധാകരൻ രൂക്ഷ വിമർശനമാണ് നടത്തിയത്. സിപിഎമ്മിന്റേത് കുറുക്കൻ നയമാണെന്നും കെ സുധാകരൻ ചൂണ്ടിക്കാട്ടി. മുസ്ലീം ലീഗിനെ കോൺഗ്രസിൽ നിന്ന് അകറ്റുക എന്നതാണ് സിപിഎമ്മിന്റെ ലക്ഷ്യം. ആ കെണിയിൽ ലീഗ് വീണില്ലെന്നും ലീഗിന്റെ തീരുമാനം സ്വാഗതാർഹമാണെന്നും കെ സുധാകരൻ പറഞ്ഞു. ഏകീകൃ സിവിൽ കോഡിനെതിരെ കോൺഗ്രസ് ജനസദസ് സംഘടിപ്പിക്കുമെന്നും അദ്ദേഹം വ്യക്തമാക്കി.
