![കാൻസർ രോഗിയായ അമ്മയെ കഴുത്തുഞെരിച്ച് കൊല്ലാൻ ശ്രമിച്ച് മകൻ](assets/news_post/satheesan28194.jpg)
കണ്ണൂർ: കാൻസർ രോഗിയായ അമ്മയെ കഴുത്തുഞെരിച്ച് കൊല്ലാൻ ശ്രമിച്ച് മകൻ. ചെറുപുഴ സ്വദേശി സതീശനാണ് അമ്മ നാരായണിയെ കൊലപ്പെടുത്താൻ ശ്രമിച്ചത്. ഗുരുതരാവസ്ഥയിലായ നാരായണി മെഡിക്കൽ കോളജ് ആശുപത്രിയിൽ ചികിത്സയിലാണ്. സംഭവവുമായി ബന്ധപ്പെട്ട് സതീശനെ പൊലീസ് അറസ്റ്റ് ചെയ്തു.
വെള്ളിയാഴ്ച പുലർച്ചെയാണ് നാടിനെ നടുക്കിയ സംഭവം നടന്നത്. നാരായണിയെ സതീശൻ കഴുത്ത് ഞെരിച്ചും തലയണ ഉപയോഗിച്ച് ശ്വാസം മുട്ടിച്ചും കൊലപ്പെടുത്താൻ ശ്രമിക്കുകയായിരുന്നു. ഇവർ ബോധരഹിതയായപ്പോൾ അമ്മ മരിച്ചതായി ഇയാൾ ബന്ധുക്കളെ അറിയിച്ചു. സതീശനാണ് കൊലപ്പെടുത്താൻ ശ്രമിച്ചതെന്ന് മനസിലാക്കാതെ ബന്ധുക്കൾ നാരായണിയെ ആശുപത്രിയിലെത്തിച്ചിരുന്നു.
നാരായണിയുടെ പരിക്കിൽ സംശയം തോന്നിയ ഡോക്ടർ പോലീസിനെ വിവരം അറിയിക്കുകയായിരുന്നു. കാൻസർ രോഗിയായ അമ്മയെ പരിചരിക്കാനുള്ള പ്രയാസം മൂലം കൊലപ്പെടുത്താൻ ശ്രമിക്കുകയായിരുന്നെന്നാണ് ഇയാൾ പോലീസിന് നൽകിയ മൊഴി. സംഭവത്തിൽ പോലീസ് വിശദമായ അന്വേഷണം തുടങ്ങിയിട്ടുണ്ട്.