ബഹിരാകാശ യാത്രിക ഇന്ത്യൻ വംശജയായ സുനിതാ വില്യംസും സ‌ഹയാത്രികൻ യൂജിൻ ബുച്ച് വിൽമോറും അന്താരാഷ്ട്ര ബഹിരാകാശ നിലയത്തിൽ കുടുങ്ങിയിരിക്കുകയാണ്. ഇരുവർക്കും ഭൂമിയിലേക്ക് മടങ്ങിവരാനുള്ള സ്റ്റാർലൈനർ പേടകത്തിന്റെ തകരാർ പരിഹരിക്കാൻ ഇനിയും സമയമെടുക്കുമെന്ന് നാസ തന്നെ വ്യക്തമാക്കിയിട്ടുണ്ട്. എന്നാൽ, കൂടുതൽ നാളുകൾ ബഹിരാകാശത്ത് തങ്ങുന്നത് സുനിത വില്യംസിന്റെയും വിൽമോറിന്റെയും ആരോ​ഗ്യത്തെ ​ഗുരുതരമായി ബാധിക്കുമെന്നാണ് റിപ്പോർട്ട്. കിഡ്നി സ്റ്റോൺ മുതൽ അസ്ഥികളുടെ നാശവും കാൻസറും വരെ പിടിപിടാനുള്ള സാധ്യത ബഹിരാകാശത്ത് വളരെ കൂടുതലാണ്. 

ബഹിരാകാശയാത്രികർ അനുഭവിക്കുന്ന സുപ്രധാനവുമായ മാറ്റങ്ങളിലൊന്നാണ് മൈക്രോഗ്രാവിറ്റിയിലെ ദ്രാവക പുനർവിതരണം. അന്താരാഷ്ട്ര ബഹിരാകാശ നിലയത്തിൽ ​ഗുരുത്വാകർഷണമില്ലാത്തതിനാൽ ദ്രാവകങ്ങൾ ശരീരത്തിൻ്റെ മുകൾ ഭാഗത്തേക്ക് മാറുന്നു. ഇത് മുഖത്തെ വീക്കത്തിന് കാരണമാകുന്നു. ഇതോടെ കൈകാലുകളിലെ ഫ്ലൂഡിന്റെ അളവ് കുറയുകയും ഹൃദയത്തിന്റെ പ്രവർത്തനത്തെ വരെ ബാധിക്കുകയും ചെയ്യാം. ദ്രാവക വിതരണത്തിലെ മാറ്റങ്ങൾ മൂത്രാശയ വ്യവസ്ഥയെ ബാധിക്കും, ചില ബഹിരാകാശ സഞ്ചാരികൾ മൂത്രത്തിൽ കാൽസ്യത്തിൻ്റെ ഉയർന്ന സാന്ദ്രത കാരണം വൃക്കയിൽ കല്ലുകൾ ഉണ്ടാകാനുള്ള സാധ്യത കൂടുതലാണ്. 

മൈക്രോഗ്രാവിറ്റി അസ്ഥികളെയും ​ഗുരുതരമായി ബാധിക്കും. ശരീരത്തിൻ്റെ താഴത്തെ പേശികളെയും പുറകിലെ പേശികളെയുമാണ് ഇത് ബാധിക്കുക. ​ഗുരുത്വാകർഷണ ബലം ഇല്ലാത്തതിനാൽ ഈ അസ്ഥികൾക്ക് ശരീരഭാരത്തെ താങ്ങേണ്ട ആവശ്യം വരുന്നില്ല. ഇതിനൊപ്പം അസ്ഥികളുടെ സാന്ദ്രത കുറയുന്നു.  നീണ്ട ദൗത്യങ്ങളിൽ ബഹിരാകാശ സഞ്ചാരികൾക്ക് പെൽവിസ്, നട്ടെല്ല്, തുടയെല്ല് തുടങ്ങിയ ഭാരം വഹിക്കുന്ന അസ്ഥികളിൽ പ്രതിമാസം അസ്ഥി പിണ്ഡത്തിൻ്റെ 1-2% വരെ നഷ്ടപ്പെടുമെന്ന് പഠനങ്ങൾ തെളിയിച്ചിട്ടുണ്ട്.

ബഹിരാകാശയാത്രികരുടെ മറ്റൊരു ദീർഘകാല ആരോഗ്യ പ്രശ്‌നമാണ് കാഴ്ച വൈകല്യം. ചില ബഹിരാകാശ സഞ്ചാരികൾ കാഴ്ച വൈകല്യങ്ങൾ റിപ്പോർട്ട് ചെയ്തിട്ടുണ്ട്. തലച്ചോറിലെയും കണ്ണുകളിലെയും ഇൻട്രാക്രീനിയൽ മർദ്ദത്തിലും ദ്രാവക വിതരണത്തിലും വരുന്ന മാറ്റങ്ങളുമായി ബന്ധപ്പെട്ടാണ് കാഴ്ച്ചവൈകല്യം ഉണ്ടാകുന്നത്.

ബഹിരാകാശ സഞ്ചാരികൾ ഉയർന്ന തോതിലുള്ള വികിരണത്തിന് വിധേയരാകുന്നു. ഗാലക്‌സി കോസ്‌മിക് കിരണങ്ങളും സൗരകണിക സംഭവങ്ങളും ഡിഎൻഎ നാശത്തിനും ക്യാൻസർ സാധ്യത വർധിപ്പിക്കുന്നതിനും കാരണമാകുന്നു. ഈ ആരോഗ്യപ്രശ്നങ്ങൾ ലഘൂകരിക്കുന്നതിന്, ബഹിരാകാശ ഏജൻസികൾ ദൗത്യങ്ങൾക്കിടയിലും ശേഷവും കർശനമായ വ്യായാമ വ്യവസ്ഥകൾ, പോഷകാഹാര നിരീക്ഷണം, മെഡിക്കൽ നിരീക്ഷണം എന്നിവ ഉപയോഗിക്കുന്നുണ്ട്. എങ്കിലും ​ഗുരുതരമായ ആരോ​ഗ്യ പ്രശ്നങ്ങളെ അഭുമുഖീകരിക്കേണ്ടി വരും എന്ന തിരിച്ചറിവോടെ തന്നെയാണ് സഞ്ചാരികൾ ബഹിരാകാശ യാത്രകൾക്ക് സന്നദ്ധരാകുന്നത്.