രാഹുൽ ഗാന്ധി ബിജെപിക്കെതിരെ മറ്റേതെങ്കിലും സംസ്ഥാനത്ത് മത്സരിക്കണമെന്നും സിപിഐ നിർവാഹക സമിതിയിൽ ഉയർന്ന ആവശ്യം.
വയനാട് ലോക്സഭാ സീറ്റിനെ ചൊല്ലി ഇന്ത്യാ സഖ്യത്തിൽ തർക്കം. കോൺഗ്രസ് നേതാവ് രാഹുൽ ഗാന്ധിയുടെ സിറ്റിംഗ് മണ്ഡലമാണ് വയനാട്. സിപിഐ കേരളത്തിൽ മത്സരിക്കുന്ന നാല് പാർലമെന്റ് സീറ്റുകളിൽ ഒന്നും ഇതാണ്. കഴിഞ്ഞ തവണ സിപിഐ സ്ഥാനാർത്ഥിയായ സത്യൻ മൊകേരിയെ പരാജയപ്പെടുത്തിയാണ് രാഹുൽ ഗാന്ധി ലോക്സഭയിലെത്തിയത്. എന്നാൽ, വരുന്ന തെരഞ്ഞെടുപ്പിൽ രാഹുൽ ഗാന്ധി വയനാട്ടിൽ മത്സരിക്കരുതെന്ന ആവശ്യമാണ് ഇപ്പോൾ സപിഐ മുന്നോട്ടു വെക്കുന്നത്.
സിപിഐ നിർവാഹക സമിതിയിൽ രാജ്യസഭ എം പി പി സന്തോഷ് കുമാറാണ് ഈ അഭിപ്രായമുന്നയിച്ചത്. സിപിഐക്കെതിരെ വയനാട്ടിൽ രാഹുൽ ഗാന്ധി മത്സരിച്ചാൽ അത്ഇന്ത്യ സഖ്യത്തിന്റെ കൂട്ടായ മുന്നോട്ട് പോക്കിനെ ബാധിക്കുമെന്നാണ് വിമർശനം. കേരളത്തിലെ നേതാക്കൾ വയനാട്ടിൽ രാഹുലിനോട് മത്സരിക്കാൻ ആവശ്യപ്പെട്ടു എന്നതിലും അദ്ദേഹം വിമർശനമുയർത്തി. രാഹുൽ ഗാന്ധി ബിജെപിക്കെതിരെ മറ്റേതെങ്കിലും സംസ്ഥാനത്ത് മത്സരിക്കണമെന്നും സിപിഐ നിർവാഹക സമിതിയിൽ ഉയർന്ന ആവശ്യം.
നേരത്തെ ലോക്സഭാ തെരഞ്ഞെടുപ്പിലെ സീറ്റ് വിഭജനത്തിൽ കോൺഗ്രസ് മറ്റ് പാർട്ടികളെയും പരിഗണിക്കണമെന്ന് സിപിഐ അഭിപ്രായപ്പെട്ടിരുന്നു. ബിജെപിയെ തോൽപിക്കുകയെന്നതാണ് ആദ്യ ലക്ഷ്യമെന്നും കോൺഗ്രസ് ഇക്കാര്യം സീറ്റ് വിഭജനത്തിലടക്കം പരിഗണിക്കുമെന്നാണ് കരുതുന്നതെന്നും സിപിഐ ജനറൽ സെക്രട്ടറി ഡി രാജ അന്ന് പറഞ്ഞിരുന്നു.
